నీ ఊహలో నేనో జాబిలికూనలా
ఆచ్ఛాదనలేని చిరుగాలిలా
ఊయలూగుతున్న తెలిమబ్బులా
నీకిష్టమైన ప్రేమాన్వితని కదా
నాకూ అంతే..
నువ్వు నాకు గుర్తొచ్చినప్పుడల్లా
మనసు హద్దులు చెరిపేసుకుంటుంది
ఎక్కడినుంచో వినిపిస్తున్న నీ పిలుపు
రసప్లావితం కమ్మని గొంతెత్తుతుంది
గుటకలుగా మింగిన విషాదం నేనైతే
దాహాన్ని కలవరించే సముద్రం కదా నువ్వు
మౌనాన్ని హత్తుకొనే రాతిరి నువ్వైతే
నిశ్శబ్దాన్ని నెట్టేసే పగలేగా నేను
రెండుచెట్ల క్రింద అల్లుకుపోయిన వేళ్ళు మనమేమో
ఎన్నోజన్మల బంధం మనమైనట్లు
ఒకరికొకరం ఎలా పలకరించుకున్నామో
ఇరువురి కలలూ ఒకేలా కలబోసుకున్నట్లు 
No comments:
Post a Comment