// నీ కోసం 121 //

హృదయ విపంచిక మీటి రాస్తున్న
వలపు గీతిక...
మంచిగంధపు చిరుకానుకగా నీకందించువేళ
నీలిగంటల అంగరాగాలతో ఈ దేహం నాదైనా
మనోరూపం నీదని తెలిసీ
ఎన్నిసార్లని చూపులదారాలతో బంధిస్తావో చెప్పూ..

చందనచర్చిత చక్కిళ్ళలో చంద్రోదయాలూ
కన్నుల్లో కస్తూరిపువ్వుల కలనేతలూ
నువ్వెదురైతే పెదవులపై ఊపిరి సువాసనలూ
నీ స్పర్శనూహించినంతనే రాగరంజితాలు..

అధరమూ..మాధుర్యమూ ఒక్కటిగా కలిసిన
మంచుతెరల మాటు పొద్దు
ప్రణయరాగం నింపిన ఉల్లాసం
నీ వేణునాదానిదేగా కన్నయ్యా..

కాలమిప్పుడు కౌగిలికొచ్చిన తపఃఫలం
భావలోకంలో ఎదురుచూపులు అంతమైన ఇంద్రజాలం 💜💕