వస్తానని మాటిచ్చిన నువ్వేమో
పొలిమేరలు స్పృశించి వెనుదిరిగి వెళ్ళావు
కలనైనా కబురెట్టకుండానే
ఎప్పటికీ కలపదనుకున్న కాలం
రెక్కలు కట్టి మరీ సాగరతీరానే
ఉదయించిన నెలవంకను చూపించేసింది
విధి చేయు వింతలన్నిట్లో
నీ చూపూ నా నవ్వూ కలవడమే విచిత్రమయ్యాక
నీ బుల్లిబుల్లి కనుపాపలెన్ని ఆటలాడాయో
ఇప్పుడిక..
రానంటే నువ్వూరుకున్నా
నిన్ను చూడాలనుకునే మనసూరుకోదుగా
మరో పున్నమి పండక్కి..
నేనొచ్చి నీ రూపాన్ని ముద్దాడేలోపు
ఊహల వెన్నెల్లో ప్రతిరోజూ తడిచిపో 
No comments:
Post a Comment