లోలోపలే హత్తుకున్న మాయొకటి
తీవ్రమైన ఎడబాటును చెరిపేసి
నక్షత్రాల నడుమ ఆకాశంలో
జాబిల్లి నువ్వేనని చెప్పేలోగానే..
చలిఊపిరిగా పెనవేసుకుపోతున్న భావాలు
మొన్నటి పొగమంచు తాలూకూ
ప్రేమను పీల్చుకున్నప్పటి చిరునవ్వులుగా..
పూలగాలి తాగిన మత్తులో నన్నుంచి
అలలుగా అల్లుకున్న రసస్పర్శ
హృదయాన్ని తడిపేంత అవ్యక్తపు అశ్రువైంది
ఇంతకీ..
శిలగా అనిమిషమై నిద్రించిన స్వరాన్ని
మోహపు క్షణాలరెక్కలపై లాలించి
కన్నులు తెరిచేలా చేసిందెవరో
దొంగతనంగా మేల్కొన్న పున్నమిరాత్రి
ఆవిరవుతున్న వెన్నెల్లోకి
చేయిపట్టి లాక్కుపోయిన బాంధవ్యమేదో
No comments:
Post a Comment