// నీ కోసం 473 //

నొప్పితెలీకుండా గుండె తలుపు తీసి నిన్ను బయటకి పంపేద్దామనుకున్నాను ఓ గదిలో అనుభూతిని ఆలకిస్తూ అంతుపట్టని జీవన సౌందర్యాన్ని సుషమ్న ధ్యానం చేస్తున్నావు మరో గదిలో మరపురాని నిరీక్షణలోని విషాదాన్ని విస్మరించుకుంటూ అప్రియాల నుండీ వేరుపడుతున్నావు ఇంకో గదిలో ఏకాంతాన్ని లాలిస్తూ హృదయాల్ని తేలిక చేసేటువంటి మృదువైన కవిత్వాన్ని రాస్తున్నావు ఆపై గదిలో నక్షత్రాలను లెక్కిస్తూ రంగు రంగుల కలలకు కబురిచ్చి చీకటిని కావలించుకు బజ్జున్నావు పదేపదే నీతోనే ప్రేమలో పడే నేను ప్రాణం చిన్నబుచ్చుకునేలా పంపలేక చూస్తూ నిలబడ్డాను