కొన్ని మాటలు నీ మౌనాన్ని దాటొస్తే ఎంత బాగున్నాయో. నా కోసం నువ్వు వెతికావన్న ఊహ మనసంతా బంగారు కాంతులు నింపింది.
సంగీతంలో మమేకమై నే తీసిన రాగానికి కోయిలమ్మ పాటతో సరి పోల్చావంటే నా గొంతుకి ముత్యాలహారం నువ్వలంకరించినట్లుంది. వెన్నెల తాగి పెదవి కందిందేమోనని నువ్వు ప్రశ్నించిన భావుకత నన్ను సిగ్గు పూలతో కప్పింది. నీ గుప్పెడు భావాలు కవిత్వంగా మారి నాలో పరిమళాలు నింపుతున్నట్లుంది.
మానసికంగా నీకు దగ్గరైన ఈ క్షణాల్లో నా విరహమెటు పోయిందో గమనించలేదు. మధురభావాలు నాలో అనంతమవుతుంటే.. ఇప్పుడీ కలస్వనాన్ని ఆపడం కష్టమే. ఊహల రసవాహినిలో మునుగుతూంటే, మళ్ళీ పల్లవి మొదలయ్యేలా ఉన్నదీ నిజమే.
తొలకరంటి చూపు చేసిన మాయకి ఈ రాతిరికెన్ని పులకింతలో రేపు వేకువకి నీకు నివేదిస్తాలే. నా కాటుకతో జత కట్టిన నీ కన్నులు ఇంకెన్ని కథలు చెప్తాయో వినాలనుంది. ఇప్పుడిక నీ పిలుపుకే నా ఎదురుచూపులు నన్ను నేను కొత్తగా వినేందుకు..
No comments:
Post a Comment