అరచేతుల్లో కలలు ముడుచుకుని
ప్రపంచమంతా తిరిగినా
ఎక్కడా పువ్వులు నవ్విన జాడ తెలియలేదు
కళ్ళు తెరిచే నిదురపోతున్నానని
ఎవరో చెప్తే, విషాదపు వీధిని వదిలి
కొన్ని మలుపులు తిరిగాను
చెట్టుచేమలు చిగురిస్తున్నా
వసంతాన్ని గుర్తించలేకపోయానని
మరింత కుంగిపోయాను
కన్నుల్లో సముద్రాలు పొంగి
పెదవుల తీరాన్ని చేరగానే గుర్తించాను
ఇన్నాళ్ళుగా ఘనీభవించిన గుండె కరిగి
ప్రవాహం మొదలయ్యిందని
ఈలోపునే...
శ్వాసలోకి పరిమళమెప్పుడొచ్చి చేరిందో
నా నవ్వులకే మత్తెక్కిపోతున్నారు ఇప్పుడందరూ
No comments:
Post a Comment