// నీ కోసం 32//

మెలకువలో నువ్వు ఆదమరచినప్పుడల్లా అనుకుంటా

నువ్వో ఆర్తిలో మౌనానికి దగ్గరయ్యుంటావని

నా గుప్పెడుగుండెలోని అనుభూతులు

నీ అనుభవపరం చేసేందుకని

ఆ నునుస్పర్శలోని మాధుర్యాన్ని

కావ్యధారగా రంజించాలనే 

కలువపూల పడవలా మనసూగుతుంది

నిన్నుక్కిరిబిక్కిరి చేసి 

ఊపిరాడకుండా చేసేందుకు 

తీయందనపు అంచులదాకా తీసుకెళ్ళేందుకు

నా ఒడి సిద్ధమైందనేం చెప్పను

నిశ్శబ్దాన్ని ప్రశాంతంగా మార్చి

కల్లోలాన్ని ఉత్సాహంగా చేయగలిగే

ఆ చిరుమంత్రం నా చీర మడతలో

ఉందని తెలిసాక ఈ దూరం దుర్భరమవుతుంది

రెక్కలేసుకొని నువ్వొస్తావు కదూ..

ఈ అపురూపానందాన్ని పొందేందుకు

ఇన్నాళ్లూ కలలకిచ్చిన క్షణాలు నిజంచేసేందుకని