// నీ కోసం 393 //

రెండు ఆత్మల మధ్య మోగుతున్న మువ్వలచప్పుడు పురాతన బంధానిది అనుకుంటే ఏమీ చెప్పక్కర్లేని మాటలు మౌనరహస్యాలు దిగులుపడ్డ మసక వెన్నెల రాత్రి అకస్మాత్తుగా అద్భుతమనిపిస్తే మెలకువలాంటి కలలోకి నువ్వొచ్చిన ఆనవాళ్ళు కావాలంటే నీ మదిలోకి తొంగి చూసుకో.. నీలో సుగుణాలు అనంత సాగరకెరటాలు పదేపదే సంగమించేందుకు రమ్మని పిలిచే తుంటరి సైగలు కదా.. కిన్నెరవీణలా నా మేను కిలికించితమవడం నీ స్వప్నమైతే కళ్యాణిలా కదం తొక్కుతూ నే రాగమవుతానన్నది వాస్తవం నిలువరించలేని నిత్యవసంతాన్ని చిలకరించడం నీకిష్టమైతే అందులో తడిచి మోహాన్ని పరిమళించడం నాకు పరవశం