// నీ కోసం 383 //

సగం రాత్రి వేళ ప్రేమ వాసనేస్తున్నట్టు నీ విరహం నా నిద్దుర చెదరగొట్టి ఒక్కసారి పొదుపుకుంటా రమ్మని పిలిచింది. ఆ రహస్య బాహువుల్లోని నిశ్చింతే నాలో చిన్న చిరునవ్వుకి ప్రాణం పోసింది. వినిపించని రాగాల నీ ఎదలోని భావావేశం, నా జుత్తు నిమురుతూ నువ్వేసే తాళం నన్నో మధువనిలోకి తీసుకుపోయినట్టుంది. నీ పెదవి దాటని మాటలన్నీ నా కన్నుల్లోని ఒంపేందుకు ఇంతకంటే మంచి సమయం లేదనుకున్నావేమో, ఒక్కో పదమూ బుగ్గల జారి రెప్పల బరువుని దించుతుంది. హృదయం లోపలంతా కవ్వం పెట్టి చిలుకుతున్నట్టు ఈ హాయి నీ స్పర్శదైతే, ఈ రాతిరి తెల్లవారొద్దని నా చుట్టూ ఇన్ని చీకటి తెరలు నువ్వల్లిన కౌగిలిదేగా. నీ ఊపిరి ఉద్వేగపు చిరువెచ్చని పరిమళం అందమైన పూలగాలికి సమానమైతే కాదుగా.. కిటికీ లోంచీ సన్నగా పారిజాత పరిమళం, నల్లగా ఆకాశం.. అరె, కలో నిజమో తెలీనట్టు, అచ్చం నువ్వు చెప్పినట్టే ఉంది, ఈ గదిలో వెన్నెల వెలుతురు కూడా, మరైతే ఇది అమావాస్య కాదా.. ఇక్కడ బిడియంతో పెరుగుతున్న నా అందం నీకు ముందే తెలుసా?!