// నీ కోసం 155 //

వెదురుపొదల నీడల్లో నీ సంకేతాలు

ఎగిసిపడే అలలపై రాసిన ప్రబంధాలు

నాలోనే నువ్వాదమరచిన రాతురులు

నీ మది నాకందించిన సన్నజాజి తరంగాలు

అసలేదీ తెలియకనే..

నీ చూపు విద్యుల్లతకి

పూలఋతువు పరిమళంలా

పెదవుల్లో చిరునవ్వులు పూయించుకుంటూ నేనొచ్చేసా

నరనరంలో ఉరకలేసి

అలసిపోయిన రక్తం

కన్నుల్లోకొచ్చేసరికి ఛిప్పిల్లింది చూసావా

అవును నేనే

నీ చిలిపి కలల లాలసను 

తీర్చేందుకు పుట్టిన మోహావేశాన్ని

నమ్మవా..?!

నీ సౌందర్యాన్వేషణ..నా ధ్యానోపాసన

యుగాలుగా పరుగులెత్తించిన ప్రేమపాశమిదేగా

ఏమో..

అపురూపమైన అనుభూతి అశాశ్వతమైతేనేమి

మేఘాల్లో విహరించే ఊహని నువ్వు నమ్మకున్నా

నీ మనసు నమ్మితే చాలనుకుంటున్నా..