//నీ కోసం 21//

చూపులకందిన జాబిలి నీవని
చీకటి తరిమిన ఛురికవు నీవని
జీవితమంత పండుగ మనదని 
ఒప్పుకునుంటే బాగుండేది..
మనసున మెదిలే మెరుపువు నీవని
రెప్పలకంటిన రాగం నువ్వని
జీవనవేద సంగీతం మనదని
నమ్మకముంటే బాగుండేది..
కాలం కదలికలాపదని
అనుబంధమీ జన్మది కాదని
మాటలకందని ప్రేమొకటుందని
తెలుసుకునుంటే బాగుండేది..
దేహానికి మరణం ఉంటుందని
ఆత్మ నిరంతర సాక్షియని
అలుపెరుగని ఆకాశానికిది తెలుసునని
ప్రాణమాగిన చోటే మరో పుట్టుకని 
ఓదార్చుకునుంటే సరిపోయేదని...