//నీ కోసం 11//

మాటలూ మౌనాలూ మాత్రమే తెలుసనుకున్నా మన పెదవులకి

పచ్చిపాల మీగడేదని నువ్వడిగేవరకూ..

ఏకాంతానికింత తహతహ తెలుసని నీ కొసపంటికింద నలుగుతున్న నా పెదవి చెప్పేవరకూ..

మదిలో దాహానికి పెదవులొకటై తీరుస్తాయని అబద్దం చెప్పావెందుకు

ఇప్పుడీ దేహానికి మొదలైన వెక్కిళ్ళు తీర్చే మంత్రం నీకే తెలుసని ఒప్పుకొనేట్టు చేస్తున్నావు

సొగసు బరువెక్కిన సంగతి తెలీనట్టు మెత్తగా ఏం నిమురుతావో

నా ఊహకి నన్నే సిగ్గుపడేట్టు చేస్తూ వలపు వీణను మీటుతావు..

నన్ను నీలో దాచేసి నీతో ఉన్న హాయి పెంచేస్తావు

చీకటిపందిట్లో నీ కనుపాపలకెన్ని నవ్వులో

ముద్దులు పంపకాల్లో నువ్వు ముందున్నప్పుడు

నీ చురుక్కు చూపులు నన్ను వెక్కిరించినట్టు..

ఈ తడిగాలి మోసుకొస్తున్న నారింజపువ్వుల వాసనకేమో

కలగా మొదలైన కోరిక అలగా నిన్నల్లుకుంది

ఇప్పటికీ గమ్మత్తులో కాలం కరుగుతూనే ఉంది..