//నీ కోసం 9//

నీ చూపులు వ్యక్తం చేసిన దాహానికి

పరిమితి తెలియని తేనెలూరిన పెదవి

ఆర్తిని అందించేందుకని అధరాన్ని చేరింది

పులకింతలు రగిలి వెయ్యేళ్ళ బంధమిదేనన్నట్టు

నీ మది నేపధ్యాన్ని పరవగా

దేహానికి రెక్కలొచ్చి వనహంసలా ఎగిరింది 

కొన్నిజన్మల సరిపడా అనుభూతులు 

అల్లరిమువ్వలై కవ్విస్తుంటే

వివశమైన కన్నులు ఏడుజన్మల బాసలు

తమకు తామే చేసుకున్న స్వగతమయ్యింది 

మత్తుగా రెచ్చివిచ్చుకున్న రేయిలో

పాలబువ్వను ముద్దులుగా మార్చుకున్న తమకం

మనోస్వరాలు ఆలపించినట్టు

అణువణువుదో వింతైన మోహం

ప్రాణానికి అంటిన రంగులధూళి

వెన్నెల్లో వెచ్చగా కరిగినట్టు

నిదురరాని రాత్రి నీ తలపుతో

నేనాడుతున్న దాగుడుమూతలు

రాగాలై వినబడుతున్న మనోనాదాలు

రేపటికి దాచి ఉంచు కౌగిళ్ళు

కొన్ని పదాలుగా మారి నన్ను అల్లుకొనేందుకు