రెప్పలు తడుపుకున్న విరహం
హృదయాన్ని సానబెట్టి
వింత అనుభూతిని పరిమళిస్తుంది..
అంతులేని ఏకాంతం కుదిరి
అంతరాత్మను చదువుతున్నప్పుడు
చప్పుడు చేయక అల్లరిపెట్టే శూన్యంలో
నీ నవ్వుతున్న చిత్రాన్ని చూస్తూ
పొగమంచులా నేనెటో తేలిపోతుంటా..
నక్షత్రపు కొనల మెరుపులా
వాలుచూపు కలుపుతున్నట్టున్న నువ్వు
హాయి కెరటాలలో ఊయలూగుతూ
పూలరెక్కలపై ప్రేమలేఖలు రాస్తున్నావనుకుంటా..
కలల మైదనంలో తరుముతూ నువ్వున్నా
ఎన్నాళ్ళయిందో నీ ఊసు విని అనుకోగానే
సుషుప్తిలోకి జారదామంటూ ఓ ఆనందం
సుతారపు తరంగమై..లోలోపలో సంగీతమై..
నీరవాన్ని దూరంగా విసిరేస్తుంది..
నిద్రించే అవసరం లేకుండానే వేకువైపోతుంది
ప్రతిరోజూ లాగానే..😊💜
No comments:
Post a Comment