// నీ కోసం 41 //

ఏకాంతంలోని నిశ్శబ్దం
నన్ను అనూహ్యంగా భయపెడుతోంది
నిన్నటి నీ మోహనమైన పిలుపు
ఈ ఉదయానికి మూగబోయింది.

అంతరంగీకరించుకున్న ఆశలు 
ఎటో కదిలిపోయిన కల..
వేకువను తలచే కొద్దీ చీకటి చెలరేగుతున్నట్టు
చాలా దూరం ప్రయాణించిన తరువాత  
ఈ మలుపులో..అదేమో ఒంటరిగా మిగిలాక
ఇంకోలా ఆలోచించాలని చూసినా
ఇంకొన్ని జ్ఞాపకాల వెంటేగా నీ అడుగులెప్పటికీ 

వాన రావడం ఒకందుకు మంచిదయ్యింది
నాలో నేను కరుగుతున్న చప్పుడు ఎవరికీ వినబడదు
తడివాసన బయటపడేలోపు గడ్డకట్టాలి
లేదంటే అంతమయ్యాయనుకున్న క్షణాలు ఊపిరి పోసుకుంటాయి

మరోసారి నన్ను చచ్చిపొమ్మని వేధిస్తాయి. 

కానీ..

కొన్నాళ్ళు బ్రతికుండటం అనివార్యమిప్పుడు
నాలో నేను రోజుకి పదివేలసార్లు ఛస్తున్నా ఎవరిక్కావాలిప్పుడు..