జ్ఞాపకాల జాతర నుంచి తప్పించుకుని
మనోవాల్మీకంలో నిద్రించిన నన్ను
ఏదోకలా తట్టిలేపుతావు
జాలిగా చూస్తున్న నన్ను
వెచ్చగా గుండెల్లో దాచుకుని
మనకిష్టమైన ఆ పాట పాడతావు
ఎక్కడో తప్పిపోయినట్టున్న నేను
కలగంటున్నానో
నిశ్శబ్దపు సుషుప్తిని పీలుస్తూ
నీ దేహపరిమళపు మత్తుని ఊహిస్తున్నానో
నా శ్వాసలో అరవిరిసిన పువ్వుల పులకింతలు మొదలవుతుంటే..
రెప్పలపై ముద్దులు ఆపకుండా
ఎంత మృదువుగా అడిగితేనేం..
"ప్రేమిస్తున్నావా" అంటూ
ఆ నవ్వెందుకు
ఆకాశంలా నువ్వల్లుకున్నాక
ఒంటినిండా ప్రవహిస్తున్న మోహానికి పేరడుగుతావా
నీ పెదవులకి నా మనసు తీపి తెలిసాక కూడా ?!
No comments:
Post a Comment