// నీ కోసం 52//

మనసు లోతుల్లోకి చూడటం మొదలైతే అంతేగా
మనో విపంచి మైమరపు స్వరాలను ముద్దులొలికించినట్టు

చీకటి మెరుపుగా ఎగిసే కెరటాల సవ్వళ్ళలా
ఎదలోని స్వప్నాలు ఎలుగెత్తి పాడుతున్న వలపుగీతికలు

సుగంధాలు మోసుకొస్తున్న లిప్తలన్నీ పూలధనువుగా
పరవశాన్ని ప్రకంపించే సుషుమ్న దారుల్లో ఊహాతీతమైనట్టు

నిశ్శబ్దంగా వెలిగే నీ కనుపాపలకి తెలిసేలా
అక్కడ కదలికల్లో ఇక్కడి చైతన్యం ముడిపడిన ఊహలు

తలపుల ద్వారాల్ని మూసేసి చేసే కనుసైగలింకొద్దు
అల్లనల్లన కలకలాన్ని రేపే పిల్లగాలివై చలించు

తడబడి చూస్తున్న కాలం నీ పేరడుగుతోంది
వెన్నెల నిరీక్షణలో ప్రేమకోటి రాసుకొనే చకోరానివని చెప్పేస్తానిప్పుడు 😉💕